الأربعاء، 13 كانون1/ديسمبر 2017

board

الطيبين بدأوا في الانقراض

د. عمرو إبراهيم مصطفى

الليلة الكلام بالدارجي لأنو ببساطة بتكلم عن البساطة بيتكلم عن نوعية من الناس كدة لمن تشوفهم بس بترتاح . بينقلوا ليك إحساس بالسعادة إنت زاتك ما بتكون عارفوا جاي من وين.  اللهم بس إنت بترتاح معاهم . دايماً الواحد فيهم بتلقاهو مبتسم وسعيد،

وطوالي هم بدوك إحساس بأنو الدنيا دي جميلة على الرغم من المشاكل الفيها . بيحاولوا دائما  يكونوا هم الأسبق في خدمة الآخرين والتخفيف عليهم وبحاولوا دايما إنو يراعوا مشاعر الآخرين على حساب مشاعرهم الخاصة في أحيان كتيرة ، وده البخليهم أتعس ناس في حياتهم  الخاصة وفي نفس اللحظة دي البخلي التانين متكيفين منهم . ديل الناس المستحيل الدنيا تمشي بدونهم.  ديل الناس لو أنت عرفتهم حتحس إنو الدنيا لسة فيها خير . لكن الكارثة إنو أجمل الناس ال زي ديل بدأوا في الانقراض . حسو بأنهم خلاس مشاكلهم زادت وإنو الدنيا بقت  ما شايلاهم وإنو أغلب الناس بقت تستغل مشاعرهم وطيبتهم دي . حسوا إنو الاستاندر الرسمي في التعامل بقى عدم الطيبة، وإنو الطيبة مش ميزة كويسة ، الطيبة بقت عوارة ومن هنا بدأ الانقراض.
والطيب لمن يتغير بيبقى كعب . كعب شديد . لأنو بكون خلاص وصل الحد . الحد في أي حاجة . وصل الحد في السكات، وصل الحد في تحمل سوء استهبال واستغلال الآخرين ليهو . وصل حد إنو ما قادر يسكت أكتر من كدة ، ولمن يصل حد السكوت بيبدأ الصراخ . ولمن يبدأ في قوة القلب بيبقى بعد داك قلبو قاسي وقاسي شديد . وبيبدأ يبني من أنقاض تجاربو النفسية السيئة ديك كلها حواجز بينو وبين الآخرين،
وحا نبدأ  نتساءل : يا رب الزول دة الغيرو  شنو؟
الزول ده ما كان كده ! شنو البقاهو كده ؟
وفجأة حتبقى الدنيا كعبة شديد . وحنزهج ونستاء بدون سبب . لكن السبب إنو بقى ماعندنا زول طيب في حياتنا الآن ممكن يسمعنا بكل طيب خاطر . ماعندنا زول بيخدمنا بدون مقابل . حنفتش يمين شمال لي واحد بس منهم وما حنلقى .
والشخص الطيب هنا دايما بكون عندو حلين : يا إما يعيش ويبقى زيهم كده أو انو ينسحب بصورة كبيرة جداً من الحياة ويركز بس في شغلو أو قرايتو أو الحاجات الخاصة بيهو. والنوع التاني دة بكون لسه في قلبو بعض الطيبة .
كدى عاينو حولينكم كدة وفتشوا شوفوهم بقو شويو والا لا ؟ . شوفوهم بدأوا في الانقراض والا لا ؟ شوفوا الناس بقت تضحك من طيبتهم والا لا؟
شوفوهم هم زاتهم الواحد بقى يخجل حتى من طيبتو دي والا لا؟
خلونا نحاول نرجع الناس ديل تاني لى حياتنا . خلونا نفتش عنهم . خلونا بدل ما كانوا هم البجونا عاوزين المرة دي نحن النمشي عليهم . ونوريهم إنو والله إنتو أحسن ناس وبدونكم الحياة مسيخة وما حلوة .
التاجر الطيب البرخص الأسعار للمواطنين خلونا نهتم بيهو ونشكروا ونمشي كلنا نشتري منو حتى لو كان بعيد.  الأستاذ الطيب الفي المدرسة البشرح للتلاميذ بدون مقابل ويهتم بيهم وبي سلوكهم خلونا نشكروا ونقدر المجهود البعملو ده . شرطي المرور الطيب  البكون واقف في الشارع وبمشي في الشارع وهمو إنو يوعي الناس وهو مبتسم خلونا نشيد  بي مجهودو .
الطبيب الطيب البساهر وبعمل بكل جهدو  عشان المرضى تتحسن حالاتم ويرجعوا يبتسموا تاني خلونا نصافحوا ونظهر ليهو مقدار امتنانا لي شغلو .
موظف الحكومة الطيب التعبان الهمو كلو يقضي مصالح المواطنين ده بيستاهل إنو نشيد بيهو  ونبلغ  مدراهو بأنهم يحفزوهو ...ألخ.
وغيرهم وغيرهم وغيرهم من الطيبين.
خلونا نخلي هدفنا دايما نفتش عن الطيبين . البحبو الناس . البحاولو يعيشوا بدون نكد . البحسسو الناس بأنهم ناس وأنهم مهمين في حياتنا.