الخميس، 21 أيلول/سبتمبر 2017

board

قفشات ومغارز

>  الليلة دايرين نفرق شوية من الضغوطات المستوطنة فينا.
>  المهم نضحك ولو على روحنا.
>  في اشارة واضحة لتحدي القدر الذي غير ملامحنا.

>  ونحنا بقينا ما نحنا.
>  وفك المحنة.
>  قبل ذلك داير اقول كلمة.
>  نفس القوة الجبرية التي ادخلت الجماعة الادخلونا في ورطة لمباني الاتحاد والمستندة إلى قرار واجب التنفيذ.
>  هي نفس القوة الجبرية التي تستطيع جديعهم في الشارع خارج مباني الاتحاد اذا رفضوا الخروج وتأسيساً على قرار واجب التنفيذ.
>  والمرة دي القرار من فوق شديد.
>  أها.
>  نرجع لي موضوعنا.
>  اليومين دي مجالس المدينة وصفحات الشبكة العنكبوتية ما عندها شغلة غير الاختطاف وتجارة الاعضاء.
>  نسأل الله السلامة في الحالتين.
>  حالة إذا كان الموضوع صحيحاً.
>  وحالة اذا كان شائعة بي فهم.
>  شخصياً خايف شديد.
>  لأنه صلعتي دي ممكن تشتغل تنك موتر عادي جداً.
>  لكن الا يخطفوني بي دفار جامبو.
>  باقي السواقين ديل ما بدخلن في الكريز او البوكس المظلل.
>  وانصح اي زول مارق يشيل معاهو تقرير طبي يؤكد اصابته بالإيدز.
>  في الحالة دي الخاطفون سيطلقون سيقانهم وروزاتهم للريح.
>  ما بخافوا من الله.
>  لكن بخافوا من الإيدز.
>  المهم.
>  في الموضوع ده طلعت نكات كتيرة.
>  قالوا واحد زهجان من مرتو رسلها للعيش من المخبز الساعة اتنين صباحاً.
>  لما رجعت قال ليها يعني الموضوع طلع اشاعة سااااي.
>  طبعا الكلاوي أغلى حاجة في السكند هاند بتاع تجارة الأعضاء.
>  قالوا بفكوها بي ضفيرتها كاملة.
>  بعدين المعلم البركبها يفصل الضفيرة محل ما يراه مناسباً.
>  عشان كده إخوتنا ناس غسيل الكلى في رفاهية ما بعدها رفاهية لانه مافي زول بطمع فيهم.
>  في سعادة تضعهم مع ناس غسيل الأموال في مرتبة واحدة.
>  المهم.
>  القصص مالية المجتمعات التي لم تخرج منها خوفة أولاد النيقا.
>  والبعض يسأل.
>  تاني الواحد او الواحدة لو مارق بالذات اذا بركب هايسات يشيل معاهو دبابة ولا كيف؟
>  أها.
>  واحد بسأل
>  إذا كانت دي العاصمة بحصل فيها كده الخلاء كيف؟
>  واحد تاني قال ليهو هو في زول في الخلاء عشان يخطفوهو؟
>  هو فضل فيها سبل عيش تخلي الزول يقعد في خلاهو ود ام رويحتو ده؟
>  وانت قايل زول الخلاء في شيء جابرو على البلد دي غير التخطيط الفسل!!
>  لكن الرأي عندي.
>  أي واحد يرى انه مراقب من خاطفين وظرفو ضيق.
>  يقعد أم قللو قبلو ويطلق العنان للمائية في شارع الله والرسول ده.
>  دي وسيلة الحماية الوحيدة المتوفرة حالياً.
>  وأبو العفين بدافع عن نفسو بالمائية دي من قديم الزمان عوجة ما جاتو.
>  ولكم ان ترددوا معي.
>  المائية حماية قوية.
>  المهم.
>  على ذكر تجارة الأعضاء.
>  قالوا في واحدة زوجها في غيبوبة.
>  الدكتور قال ليها الزول ده مخو انتهى وما في طريقة الا نغيرو ليهو.
>  قالت ليهو ان شاء الله التكلفة معقولة.
>  قال ليها حسب نوع المخ الدايرنو.
>  المخ الامريكي بي خمسمائة مليون.
>  والمخ العربي بي مليار ونص.
>  قالت ليهو ليه لكن؟
>  قال ليها المخ الامريكي بنطلبوا من تجار الأعضاء الامريكان الصباح المغرب بكون عندنا.
>  ختت التلفون بخطفوا ليهم اقرب امريكي ويرسلوا لينا مخو.
>  لكن المخ العربي صعب شديد.
> نطلبو شهر واحد لي شهر اطناشر ما بتلقي.
>  يفتحوا ليهم عشرة آلاف رأس عربي وما بلقوا فيهم مخ.
>  عشان كده غالي.
>  زوجة المريض قالت ليهو وترامب رجع من السعودية !!!!!!
>  أيها الناس.
>  أخبار شيبوب شنو؟
>  وجابسون لسه في الكنبة؟
>  جابسون ده شوفوا ليهو كريز تريحكم منو.
>  المشكلة ركبة شغالة ما فيهو.
>  أيها الناس.
>  إن تنصروا الله ينصركم.
>  أها.
>  نجي لي شمارات والي الخرتوم.
>  الليلة الشمار ترويح يا والينا.
>  قالوا الحكومة الالكترونية شبكتها طشت ودت ناس التقديم الالكتروني للجامعات للحج، ووزعت ناس الحج الالكتروني على الجامعات.
سلك كهربا
ننساك كيف والكلب قال: زمان الخطف ما كده… ما فيهو كتل.
وإلى لقاء.
سلك

الأعمدة

د. حسن التجاني

الأربعاء، 20 أيلول/سبتمبر 2017

خالد كسلا

الأربعاء، 20 أيلول/سبتمبر 2017

الصادق الرزيقي

الأربعاء، 20 أيلول/سبتمبر 2017

إسحق فضل الله

الأربعاء، 20 أيلول/سبتمبر 2017

محمد عبدالماجد

الأربعاء، 20 أيلول/سبتمبر 2017

كمال عوض

الأربعاء، 20 أيلول/سبتمبر 2017

خالد كسلا

الثلاثاء، 19 أيلول/سبتمبر 2017