الإثنين، 24 تموز/يوليو 2017

board

أشرق الوالي على ظلمات سوق العيش

>  كشافات كردنة عجزت عن الإيفاء بحاجة الإستاد للضوء
>  فكانت إضافات كشافات بيوت البكا التي عاكست الكاميرات وجعلت أهل المقصورة يضعون أياديهم على جباههم ليشاهدوا الكورة
>  لذا فات على الكثيرين منهم مشاهدة روعة السماني وسجدة اب ستة
>  المحظوظ فيهم شاهد اب ستة رافعاً من السجود
>  وظل سوق العيش مظلماً
>  لو مرقت إيدك مابتشوفها
>  إلا أن زيارة الوالي لهم كانت أول إشراق على سوق العيش
>  لدرجة أن الجقور توارت
>  لأن الجقور لاتظهر الا في الظلمات
>  والجقر البظهر في النور ده جقر داقس ساكت
>  الزيارة لم تعجب روشا على حد تعبيره
>  ولافطومة اختي
>  ولكن بما انو اي شيء زاد
>  المثل القديم ذاتو زاد
>  المثل البقول
>  ابدأ العرس ربك بتمو
>  زاد واصبح كالآتي
>  ابدا العرس ربك بتمو وابدأ الاستاد جمال بتمو
>  ولذا كان تبرع الوالي الملياري لاكمال مظلات كردنة البيش المعروشة خيش
>  عفيت منك يا والي
>  تقعد تسلي وتقوم تخلي
>  ولكن
>  الكثير من الأهلة خاف من زيارة الوالي
>  ظناً منهم أن الراجل جاي يعمل مقلب
>  وليهم حق لأنو كديس فداسي المربيهو الوالي ماحصل دخل برج حمامهم ده والا خرج بأكبر وأشحم حمامة عندهم
>  فطومة اعملي رجيم
>  فتسارعوا للتجديد لمكسيم خوفاً من كديس فداسي المربيهو الوالي
>  والعقد الجديد زي العقد القديم
>  البره الخط بره العقد
>  والبره الخط مع مكسيم ده حصلت كتير خلاص
>  قون علولو في بداية الموسم داك من دائرة السنتر بره الخط
>  قون الميرغني كسلا بره الخط
> قون اتحاد ليبيا بره الخط
>  قون اتحاد الجزائر بره الخط
>  قون مريخ نيالا في الدوري ده بره نيالا
>  قون اهلي مدني في الدوري ده باستاد الهلال بره شارع مدني
>  والامثلة كتيييرة آخرها قون السماني ابو سجود من غير وضو ده كان من بره العقد ذاتو
>  حارس زي ده بجددوا ليهو يافطومة قبل يكمل مدتو لو ما الخوف من كديس فداسي المربيهو الوالي؟
>  وتبجحت فطومة اختي قالت المريخ اعاد بكري خوفا من كردنة
>  هاهاهاهاها
>  والله ياهو البضحك
>  بكري ومحمد عبد الرحمن والسماني قلعهم الوالي من آدم؟
>  هدايا كردنتك وغزوات كديس فداسي المربيهو الوالي هي اسباب قدوم بكري الفقري والسماني الغالي البسجد الناس بدون صلاة وبدون وضو ومحمد عبدالرحمن الذي سيهزم نجم تونس
>  وضحكتني فطومة شديد لما قالت
>  حتي لا تتكرر وجعة شيبوب وابراهومة وسلمون واوكرا
>  فطومة فرقي بين النفايات والنافعات
>  نحن وضعنا ابراهومة واوكرا في كيس النفايات بالشطب
>  فما هي فهلوة كردنة في ذلك؟
>  ونحن الذين لحقنا سلمون عربة النفايات باشتراطنا خضوعه للكشف الطبي قبل التجديد لنا
>  وهو الآن على كنبتكم يحمد خمتكم ومستني عربة نفاياتكم تشيلو
>  اما شيبوب
>  اعدناه بعد ان تلب من الفندق الداسنو فيهو انتو
>  وفكيناهو في شارع الله ده
>  وعلي الطلاق يافطومة تدخل الاجاويد لاقناعي شخصياً يوم مهرجان استقبال اللاعبين الجدد بالمريخ وقتها
>  تدخلوا لاقناعي باخبار الجماهير بقدوم شيبوب حتي امهد له دخول الاستاد لأنه بالقرب من الاستاد مع الاجاويد ديل ذاتهم
>  طلبوا تدخلي حتي تقبل جماهير المريخ
>  وعلي الطلاق كان ردي كالآتي
>  لو جماهير المريخ قبلت بشيبوب لن اقبل انا
>  وساقوا شيبوبهم ومشوا
>  والاجاويد قاعدييييين يافطومة
>  كردنة شنو البقلع من المريخ يا اختي!!!
>  فطومة
>  شفتي ليك كديس بختف ثعلب وارنب ويجري بيهم؟
>  حاتشوفي قريباً
>  ابقوا علي ثعلبكم وارنبكم عشرة
>  الكديس هايج وحااااايم الليل كلو
>  المهم
>  الزيارة كان ممكن تكون نتائجها ايجابية لو الناس صفت النية
>  واعجبني حديث الوالي وكردنة وتشديدهم على اعلام وجماهير الناديين بعدم اساءة رموز الناديين
>  اعجبني ذلك برغم ان المستفيد الوحيد منه هو الهلال
>  فالرمز عندنا لا تحوم حوله شبهات حول حسن اخلاقة وجمال خصاله وعظمة تربيته
>  ولا تحاصره ادانات سقطت بالتقادم واخري لم تسقط وثالثة جديدة في المستقبل ودولية كمان
>  برغم كل ذلك اعجبنا التوجيه لان الوسط كلما كان محترماً كلما تفرغ الناس للتطوير
>  المهم
>  كتب روشا إن الفيفا جابت انذار للمريخ عن طريق الاتحاد السوداني..> الانذار ده جابوهوا يا روشا للمدهش بتاعكم ده ولا للمكنكش بتاعنا ده؟
>  عشان تعرفوا التناقض
>  روشا لايعترف باتحاد معتصم
>  ولكن روشا يعترف باتحاد معتصم اذا تعلق الأمر بانذار الفيفا للمريخ
>  مابندفع قروش كوفي الا يجيب لينا الانذار الفريق المدهش ياروشا
>  قال فريق قال
>  والله انت ياروشا لاعندك فريق ولاعندك فريق
>  فريق ميت في صفرو موته
>  وفريق يقابلوهوا بالبرمودا
>  المهم
>  شاهدنا نجم تونس امام الترجي
>  الناس ديل مابقدروا علي العقرب وجكسا
>  ووسط دفاعم فيهو اتنين اب ستة
>  السماني يوم التلات الا يجيب معاهو برش
>  السجود حايكون جماعي
>  المهم
>  الحبيب البلال قال سلك بقعد جمب الدايات
>  الدايات اكتر من الرايحات
>  الدايات عندي فيها شهادة بحث
>  انت قايلني قاعد جمبها بي شهادة وارد يا بركة ولا بي لوحات ليبية؟
>  ايها الناس
>  الشفوت يعملون ليل نهار لأجل نصر كبير يوم التلات
>  واعلان ومناشدة للشفوت
>  بالقلعة الحمراء من عصراً بدري يوم التلات للمشاركة في مسيرة النصر الكبيرة التي ستجوب شارع المريخ قبل المباراة
>  من النادي للمحافظة لود البشير
>  الشارع ده شهد جويات كتيرة
>  دايرين نذكروا بيها عشان نفتش الماضي ونرجع ليهو
>  كعبين البفتشوا ماضيهم ويلقوا جقر بس
>  لان مخزن الماضي عندهم صفر كبير
>  لذا يسكنه جقر كبيييسر
>  الخوف كديس فداسي المربيهو الوالي يمشي برجكم ده ويختف جقركم يحلكم من صفركم
>  لكن العزاء الكديس مدرب مابختف ساي
>  المهم
>  ماتقدونا بي جوهرة جوهرة
>  المثل بقول
>  مامهم كيف تبني المهم وين تبني
>  وموقعكم ده وهمان الببني عليهو مجرد امل
>  زريبة وموقف ومنطقة وحوش بلدية
>  وجقووووور
>  ايها الناس
>  ان تنصروا الله ينصركم
>  اها
>  نجي لي شمارات والي الخرتوم
>  كان شفت يا والينا
>  المطرة نقطت فينا
>  وفي حتات قالوا يعمينا
سلك كهربا
ننساك كيف والكلب قال المطرة بقت بالمحليات.
والي لقاء
سلك