السبت، 19 آب/أغسطس 2017

board

الليلة يومك يا زعيم

>  اليوم يوم ليس كالايام الماضية.
>  ولا يشبه الايام القادمة.
>  انه يوم فريد

>  اراد الكيان ان يقدم شكره الجزيل لرجل اجزل العطاء دهراً من الزمان حتى صار مرجعية.
>   قدم الغالي والنفيس وعاصر الكبار والقدرو والبعدو فصار الزعيم.
>  انه محمد الياس محجوب.
>  قل ان شئت الزعيم.
>  ولك ان تقول الكبير.
>  ويمكن ان نطلق عليه المرجعية.
>  فكلما اهتز عرش الكيان هرول الناس للمرجعية.
>   كلما اختلف الناس هرعوا لود الياس الذي يحيل اختلافهم  إلى تلاقٍ في رحاب الكيان.
>  ود الياس بجروا عليهو ما بجروا منو.
>  ود الياس هو الاسم الذي عرف به بين انداده ويحلو للناس اطلاقه عليه.
>  كذاب من يوفيه حقه وصفاً.
>  لذا اقدم خطوطاً عريضة عن الرجل فأل الخير.
>  عضوية ود الياس بنادي المريخ منذ  1962  وحتى يومنا هذا.
>  دخل عضواً بمجلس المريخ في بدايات السبعينيات.
>  فكان دخوله فأل خير وهو الموسم الذي احرز فيه المريخ بطولة الدوري بالعلامة الكاملة دون تعادل او هزيمة.
>  وهو الانجاز المسجل عالمياً باسم المريخ وليفربول الانجليزي.
>  والعندو انجاز زي ده يجيبو.
>  ما تقول لي برضو الجماعة حققوهو لمن لعبوا في دوري الكنغو.
>  واستمر ود الياس فأل خير.
>  ترأس بعثة المريخ لتنزانيا للمشاركة في سيكافا86 م فعاد باول كأس محمول جواً لهذا البلد.
>  اول بطولة اقليمية يحققها فريق سوداني اتت من تنزانيا رفقة بعثة يقودها ود الياس.
>  ويتواصل الفأل خيراً مع الرجل.
>  فترأس بعثة المريخ لبطولة الشارقة في التسعينيات.
>  وعاد كعادته بكأسها.
>  ومن مواقف ود الياس التي لن ينساها الزمان والتي تؤكد على تقديمه للمريخ على مصلحة نفسه.
 >   تنازله للراحل المقيم حجوج عن الرئاسة.
>  فوقتها كان مرشحاً لها وعبد الحميد مرشح.
>  رأى خيراً في حجوج فتنازل عن منافسته على الرئاسة لمصلحة الكيان.
>  ولأنه كبير وليس من عبدة المناصب لم يقبل باي منصب غير الرئاسة وفضل تقديم العون من خارج المجلس.
>  وقد كان.
>  وكان ذلك اول أسباب فوزنا بمانديلا.
>  الرجل كبير.
>  وكبير جداً.
>  وتكريمه يؤكد ان امة المريخ كبيرة ووفية وما نساية.
>  وتكريم الرجل يعني نيله وسام الانجاز المريخي والاعجاز التاريخي من الدرجة الاولى.
>  وصدقوني يتشرف الوسام بود الياس.
>  فود الياس يضيف للوسام والتكريم.
>  والتكريم لا يضيف لود الياس شرفاً سوى اعلان تقديرنا لجهود الرجل التي قدمها.
 >  شكراً للقائمين على التكريم فكرةً وتنفيذاً.
>  حضورنا فرض عين.
>  كلنا نسجل حضوراً انيقاً لمشاركة الزعيم عرسه اليوم.
>  والبرنامج حافل وشيق وممتع.
>  وكل الوان الطيف المريخي ستسجل حضوراً انيقاً يضيف للتكريم ابعاداً ويعطيه عمقاً يحقق معناه الجميل.
 >  ولجواهر قصة.
>  النت يلقط لينا في المحن.
>  ولكن ماهو المطلوب منا كبشر بنخاف الله في هذه المواقف؟
>  سنعود لقصتها يمكن تكون قضية.
>  ايها الناس.
>  ان تنصروا الله ينصركم.
>  المهم.
>  كورة القضارف متين؟
>  شامي لي ريحة.
>  وبعدها لن يدع ناس محمد عبد الماجد وروشا لشرطة القضارف جمبة ترقد عليها.
>  ولا نستبعد ان يستغل الزول علاقته بالوزير المعني ليتصل بنظيره بتاع الداخلية عشان ينقل شرطة القضارف مناطق العمليات.
>  فذلك الزول ما بخجل، وذلك الوزير لن يتردد في تلبية طلبات الزول المغندل (فجأة).
 >  أها
>  نجي لي شمارات والي الخرتوم.
>  كان شفت يا والينا
>  قدر ما نختلف ونلفح عشان نسعد صغاراً لدينا.
>  نلقى الأسرة عيونها حزينة.
>  الشفع ضعااااااف يا والينا.
>  الاسرة قادة عربي ملولوات كرعينا.
>  نختف ونلبع و نجيب يا والينا
>  والاسرة لسه حزينة.
>  يوم ضربنا لينا ضربة وخمينا.
>  البيض والزبادي والجبنة السايله والعسل والزيتون يا والينا.
>  قلنا نملى عيونهم عشان يملوا عيننا.
>  ما معقول قدر ما نجيب الشافع عينو حزينة والشافعة رقاق كرعينا.
>  ختيتهم في المطبخ واتلبدت يا اخينا.
>  جات المره
 >  شوف عيني يا والينا
>  الزبادي مسوح من شعرها لي كدارينا.
>  وطبق البيض كش كش كسرتو يا والينا.
>  وجلبطت بيهو كيعانها وضلافينا.
>  الجبنة السايلة قناع من حواجبينا لي حنكها السنين ده يا والينا.
 >   والعسل للنمش لو قلنا نقطة لكل نمشة دايره ليها صفيحة يا والينا.
>  وحتى الزيتون ختتو في اضنينا.
>  وكمل التموين والاسرة لسه حزينة.
>  والشافعة قلم الرصاص ساقينا.
سلك كهربا
ننساك كيف والكلب قال النسوان الوشوشن عراض ديل جردل زبادي ما بكفيهن شوفوا الوجوهن دقاااق زي الككو كاس كابو الصغير ده يمسحها اسبوع وما يكمل.
والى لقاء.
سلك