mlogo

كتاب الرأي

المقالات

الحقوا شركات الكهرباء (10)

هاجر سليمان
لن اتحدث كثيراً فى زاويتى لهذا اليوم، ولكن اوضح لكم الآتى لتتأكدوا بانفسكم من صدقنا في ما ذهبنا اليه فى زاويتنا في الايام الماضية، فإنه ليوم امس الاول بلغت جملة البلاغات الواردة لدى مكاتب حلة كوكو، ام ضواً بان، شمبات، ابو حليمة وغيرها من المكاتب التى يبلغ عددها (13) مكتباً نحو (4872) بلاغاً. يا جماعة كل الناس دى كهربتها مقطوعة قطع مقصود.. يا مواطن نعم انتو مقصودين ومعنيين بالقطع ده عشان يحققوا عبركم طلباتهم، والليلة مضت اربعة ايام لانقطاع التيار الكهربائي عن العديد من المساكن، نعم يا مواطن انتو الآن مقصودين ولا شعورياً اصبحتم مستهدفين من قبل منسوبي الكهرباء، وهم ما لم يحققوا حاجاتهم ما حتجيكم كهرباء ولاغيره، ونخشى على الخرطوم من استهداف كهربي يتسبب فى اطفاء المدينة بسبب قلة قليلة مستضعفة.. اتقوا الله يا هؤلاء زمن اى الكواكب انتم؟ حدثنى بعض المنتمين اليهم وطلبوا منى ان اقول الحق ولا اعرف ماذا يقصدون بالحق، فهم يرون ان الحق يجب ان يكون لصالحهم حينما يطفئون الكهرباء ويمتنعون عن الاستجابة للشكاوى، ويرون الحق ان يموت الاطفال الابرياء داخل الحضانات، يرون الحق ان تتأزم انت يا مواطن عشان يمرروا اجندتهم عبرك!! وحينما طالبتهم بأن يمدونى بالمستندات التى تعضد موقفهم حتى يتسنى لنا نشر وجهة نظرهم لم يقوموا بارسال المستندات حتى الآن، مع اتجاههم وميولهم لمقاضاتنا.. سبحان الله من يقاضي من؟؟ ارعوا بي قيدكم يا انتو والجاى بطمم بطنكم لسه.
احدهم امس قال فى (اذاعة هلا) ما فى مواد ولا عدادات ولا ولا.. بالله انت مهندس كبير بتقول مواد مافى؟ ليه ما اشتكيت من زمان ولا دايرين تركبوا موجة الاحتجاجات بس!! وايضاً قالوا ان لديهم مطالب.. يا أخوانا قصة الكهرباء معانا زى قصة مريض على مشارف الموت نقلوهو المستشفى لقوا الطبيب مضرب ومضرب ليه؟ مضرب عشان مجلس الادارة ما حقق ليهمو مطالبه!! وقوم يا المريض مووت.. فى الحالة دى المفروض يسألوهو ويقدموهو للعدالة منو؟ الطبيب الرفض يسعف مريضنا؟؟ ولا رئيس مجلس الادارة ؟؟
مازالت معظم خطوط ادارة الخرطوم خارج الخدمة رغم الاستعانة بمهندسي الادارة العامة للتخطيط والمشروعات بالرئاسة للعمل واصلاح الاعطال، واهل الوجعة متفرجين ومبسوطين وبيقولوا تستاهل يا مواطن، ولازم تنضغط اكتر واكتر.. بالله دي حالة دى.. لازم الناس ديل يتقدموا للمساءلة ولا ناخد حقنا حمرة عين وفتوة.. واى مواطن مستعد يأخد حقه رجالة يرفع يدو!!

Who's Online

783 زائر، ولايوجد أعضاء داخل الموقع

Search