mlogo

بابكر سلك

بابكر سلك

مريخ الشعب مرييخونا

< آخر بروفه لنا اليوم للقاء الجيش السوري
<  برغم ضعف الاستعداد والاعداد وانضمام وجوه جدد في بعض الخانات المهمة وعودة بعض الوجوه القديمة لخاناتها من يوغندا
<  الا ان الامل يحدونا بالعودة بنتيجة على الاقل لا نعاني معها في التأهل من ام درمان
<  ولانها بروفة يجب ان تشمل ايضاً بروفة للمشجعين
<  منها نصنفر الحناجر ونوحد الصفوف وندعم اولادنا معنوياً ونحرجهم بواقع ان هنا جمهور ينتظر عودتهم ظافرين
<  ولنسمع منهم صرخة النصر بعد ان اسمعونا عبارة حقي وحقوقي كتير
<  المرة دي حقنا نحنا
<  نحنا شعب مريخ الشعب
<  مريخ الشعب دي يوم بتكتل ليها زول
<  بشوف في ناس مزعلاهم
<  صديقي جعفر سليمان ما بحب قولة مريخ الشعب
<  بنرجع للحتة دي
<  المهم
<  انها بروفة للجهاز الفني
<  وبروفه للاعبين
<  وبروفة للجماهير
<  وبروفة لصرف الاستاد
<  سيما والخريف كشر عن انياب السنة دي بتعضي طوالي
<  وعلى ذكر الخريف
<  نكفر لاهلنا في النهود
<  ولاهلنا في كسلا
<  ونقدم الدعوة لانفسنا ولغيرنا ولمنظمات العون الانساني
<  يجب ان تتسارع الخطى نحو المنكوبين
<  يجب ان تمتد الايادي بمساحة وطن للعون والغوث
<  المرجو عدم اصطحاب الحكومة
<  فالمجال ليس مجالاً لخطب رنانة
<  ولا مجال للاندكروزرات تقف الى جانب الخور وبناطلين ترفع ورجلين تخوض الوحل تحت اضواء عدسات التصوير
<  ندعو الجميع الا الحكومة
<  لو دايرة تقدم شيء كان قدمتو قبل الخريف
<  لكن بعد المرق وقع في الرأس
<  كتر خيرك يا حكومة
<  ما تجينا
<  على الاقل نأمن مافي رسوم غرق وانهيار مباني حاتشيلوها مننا
 <  المهم
<  كل القوة القلعة جوة
<  دقت طبول معركة العرب
<  نريدها موقعة تطمئننا على الحرب بالشام
<  نريدها موقعة ينصرف فيها كلو زول فينا لواجبه تجاه المريخ بعيداً عن الاحتراب والمواقف السالبة ومضيعة الوقت والجهد في امور انصرافية.
<  المهم
<  اختيارات المدرب لخط الهجوم ما صعبة
<  انا لو محلو لما اجي اخت التشكيلة بقول
<  المهاجمين
<  اي تلاته جاهزين يدخلوا
<  اها
<  نرجع لمريخ الشعب
<  مرييييخونا
<  عقدة الخواجة مازالت تتملك بعضنا
<  يعني لازم تشتري المريخ عائلة او فرد عشان نكون متقدمين ومتطورين وفاهمين؟
<  ملكية الشعب للمريخ ما مشرفه يعني؟
<  عيب لي الشعب
<  الشعب ده عداهو العيب غير عيب واااحد وقريب ده بخليهو
<  الظروف بتجبرو
<  لكن يستطيع ان يمارس ملكيتو لمريخو
<  مريخ الشعب كما ورد بقناة ام بي سي
<  اخير لنا تخلفنا ده ونحن نملك المريخ ونهتف مع هاشم الزبير
<  مريييييخونا
<  اسي لو امتلكتو مثلاً عائلة السنجك
<  نهتف نقول شنو؟
<  نقول مريييخونا بتاع ناس السنجك؟
<  ولا نقول
<  مو سلا..  مو سلا
 <  اسي عليكم الله
<  احسن مو سلا..  ولا احسن
<  مرييييييخونا
 <  ايها الناس
<  نريد عهداً بقدر الطموح ومساحة تمكن جميع البصمات من الظهور عليها
<  ايها الناس
<  ان تنصروا الله ينصركم
<  اها
<  نجي لي شمارات والي الخرتوم
<  ووووب علينا يا والينا
<  المطر جانا عديييل ما جايينا
<  والحكومة طبعاً حا تتفاجأ بالخريف الضيع البلد وخمج طينا
<  البلد الخمج طلع عينا
سلك كهربا
ننساك كيف والكلب قال كلما نزلت مطرة اهتفوا
تسقط تسقط الأمطار.
وإلى لقاء.
سلك
 

Who's Online

378 زائر، ولايوجد أعضاء داخل الموقع

Search