بابكر سلك

بابكر سلك

فتحية وقعت في المية

> نحمد الله إنو العيد جانا
> ونحمد الله إنو العيد لما جانا لقانا
> فالظروف التي نعيشها دفعتنا للقناعة بإنو العيد لو جانا ما حايلقانا
> وحايكتب على شواهد قبورنا حضرنا ولم نجدكم
> لكن ربك رب الخير أراد لنا البقاء برغم الشقاء
> أخص بالمعايدة السنة دي الوطن
> كل سنة وإنت طيب يا وطن
> والقابلة في الخريطة موجود بهملة ومهلة
> متجدع تامي ولأولادك لامي
> أولادك سواسية قدام عينك
> قارين مجاني
> متعالجين مجاني
> متحابين في الله وبيك
> إن شاء الله العيد القادم لا نحس بالغربة ونحنا فيك
> ولا تحس إنت بي غربة وإنت جوانا
> ويا وطن في قلبي دقات اسمك إيقاعها بيزيد
> يا وطن في عيوني رسمك لوحة النيل والخلود
> يا وطن ساعاتنا دقت وأعلنت إنك في عيد
> يا وطن في قلوبنا إنت ونحنا بي حبك نجود
> إنت إنت وإنت لينا وليك من الأفضال علينا
> ويا وطن يكفينا إنك في بطاقاتنا الاسم
> نحنا نفخر بيك سمعه وإنت شمعة تضوي لينا
> ويا شرف اسمك يدقدق في جوازاتنا الختم
> وعيدية أخص بها الحبيب ورفيق الدرب ونبض القلب كاتب الأبيات أعلاها الصديق أكرم زكي وأسرته الكريمة
> آها 
> فتحية طواااالي واقعة من البلكونة
> تقع بردولووووب في واطات الله دي
> الدور ده فتحية وقعت في المية
> فبعد فشل طشت الكاردينال في تصريف الموية
> فتحية وقعت في المية تششششششش
> وغطست جومبلووق
> المحاولة رقم اتنين وتسعين قادمة 
> والخوف وقعة فتحية الجديدة تكون من التمهيدي لمزبلة التاريخ
> الصديق عبد الله الزعيم الهلالابي الكبير يعاني من السكري سنين طويلة
> لف العالم كلو والسكري ما نزل
> سكريهو أظن ورقو كعب
> أبى ينزل نهائي
> قال لي أي حاجة الدكتور قال لي خليها خليتها والسكري ما نزل
> قلت ليهو خليت الهلال ?
> قال لي ابددداً
> قلت ليهو وداير السكري ينزل كيف بس
> البركان انفجر من لحظة تمرير البوركينابي الكرة التي نتج عنها الهدف الأول 
> وأكد الانفجار البوركينابي نفسو بهدف تاني
> وشظايا كثيرة انطلقت من فوهة البركان في تلك الليلة التي وقعت فيها فتحية في المية طششش
> لكن ربك رب الخير لطف
> الهزة الأرضية البالغة خمس درجات بالمقياس يوم زلزال مازيمبي
> كان فقدت رقمها القياسي البالغ خمس درجات
> وكان الرقم القياسي الجديد يدون باسم بركان المغرب أبو عشر درجات
> لأنو بطن يونس براها مارقة ليها تلاتة أقوان
> ده غير الدقن في الرجلين
> والجن جمب القائم
> ولكن يعجبني في الأهلة إصرارهم على المحاولة 
> المحاولة الجديدة تحمل الرقم اتنين وتسعين
> ولسه
> حاتطولوا وتاخدوا مدة يا محمد عبد الماجد
> حاتتحفنا باقي الموسم ده بالكتابة عن عثمان حسين
> لكن نصيحتي ليك
> تكتب عن الحقيبة يا حمادة
> الحقيبة ما بتنتهي
> وهلالكم ده أغاني عثمان حسين ما كفاية عليهو
> قصتو طويلة
> وشنقلت فتحية من البلكونة كترت يا اخوي
> والجايات أكتر من الرايحات
> أقع الحقيبة
> هوي ياليلى هوي براها بتديك موسم
> المهم 
> قدمنا مباراتين أمام الوطني جيدتين
> وانتصرنا بفضل الله ومجهودات ناسنا
> وهتفنا ماهمانا مدام سومانا معانا
> ولكن المحبط كان حال إستادنا
> أرضية الملعب زي لبس الصاعقة
> ولو صورت بالموبايل من بعيد
> الصورة بتطلع ليك زي خريطة العالم
> محيطات وبحار وأنهار ويابسة
> من أول وهلة ظنيت إنها مباراة كرة قدم شاطئية
> بيتش بس
> ولأني أعلم أن ملوحة الأرض هي السبب الأساسي في مشاكل النجيل في الإستاد
> إلا أنني متيقن بأن الإهمال له دور كبير فيما حدث
> اللوم لا يقع على مجلس الوفاق
> لأنه حينما استلم وجد الملعب مصاب بالبهاق
> الإهمال إهمال مراحل قبل كده
> الآن الأمر بيد شركة متخصصة
> ولكن لاحل إلا بفصل تربة الملعب عن التربة الملاصقة كي لا تتأثر تربة الملعب بالملوحة الموجودة بالمنطقة
> ولا يتم ذلك إلا بحفر حوض قدر الملعب وبعمق محدد ويغلف بالخرسانة ثم مواد عازلة ثم يملأ بالرمل المخصص والحصحاص كفلتر ثم توضع على ذلك التربة المطلوبة
> مع ملاحظة ملء الحوض بصورة مائلة للجهة الغربية او الشرقية ويوصل في أسفلها مواسير صرف لتنقل الماء الزائد عن حاجة التربة للخارج من بيارة تعد لذلك الغرض وبواسطة طلمبة
> ده الحل الجذري
> خلاف ذلك يبقى الموضوع كلو مسكنات ساي
> والحل ده مكلف جداً
> اقترح على المجلس الاتفاق مع شركة متخصصة للحل الجذري
> وإنشاء صندوق منذ الآن لهذا الغرض
> يساهم فيه جميعنا
> مريخاب داخل وخارج
> روابط وتنظيمات
> قروبات ومجموعات
> على أساس أننا نوفر المال اللازم ليبدأ العمل من أول يوم يقفل فيهو الموسم
> إنها مسؤولية جماعية تتطلب فقط قيادة رشيدة تنسق بين دعمنا للمشروع وإنجاز المشروع
> لكن سومانا خطر
> خطر شنو
> ختري عديل كده
> أيها الناس 
> إن تنصروا الله ينصركم
> آها
> نجي لي شمارات والي الخرتوم
> كان شفت يا والينا
> ولايتك عيدت بي بواعيضها وضبابينها
> زي الماسمعت بالعيد يا والينا
سلك كهربا
ننساك كيف والكلب قال الناس الشغلها إبادة الباعوض ديل والجهات المعنية بقوا يدوا الباعوض ده فايتمين ولا شنو ?
والى لقاء
سلك
 

شاركنا برأيك

هل تتوقع أن يتجاوز الطاقم الاقتصادي الحالي الازمة؟

تواصل معنا

حالة الطقس بالخرطوم

Search