mlogo

بابكر سلك

بابكر سلك

الدعم السريع والجيش السوري

>  ملحمة الأمس ومعركته كانت رائعة روعة بطل المحمولة جواً.
>  الجيش السوري عاد ببراميله المتفجرة الى دمشق لعطل فني.
>  فقد اصابتهم صواريخ الدعم السريع.
>  استغل المريخ في معركته قوات الدعم السريع التي تمثلت في العقرب وميدو وتيري.
>  فلخبط حسابات ادلب.
>  وعكر صفو حلب.
>  واستغاثت درعا بدكا.
>  اما القوطة الشرقية فلم تجد بداً من ايقاف مدفعية التش غير عرقلته.
>  قوات الدعم السريع المريخي قادرة على قهر الجيش الامريكي ذاتو ان ارادت.
>  فقط علينا تهيئة الجو المناسب لها ونبذ الخلاف والاختلاف وصناعة قبة للحرب من حبة النظام الاساسي.
>  ابردوا.
>  وخلوا مريخنا يبدع.
>  فالقصة ليست عنتريات ولا اظهار عضلات ولا مصالح شخصية.
>  القصة قصة مصلحة مريخية وبس.
>  مبروك مريخ السودان النصر لسودان المريخ .
>  مبروك زنبقة جيش سوريا على ارضه (فرضا).
>  فالزمبوق السوري لم يكن متوقعاً للزمبقة من واقع المعلومات التي تحصل عليها من زنابيق السودان في اكبر عمليات خيانة الوطن.
>  ما كلموهم.
>  ما قالوا ليهم تيري كان جري مابلحقو ود مرة.
>  ما حكوا ليهم.
>  ما قالوا ليهم ميدو بحب الهاتريكات.
>  غايتو يا فطومة يا اختي.
>  الدكتور القال ليكم ميدو معطوب وزجاجي.
>  بكون درس الطب في نيو سايت.
>  المدينة الما قامت لي اسي.
>  المهم ناس الجيش السوري ما قصوا ليهم.
>  ما قالوا ليهم العقرب السودانية ما بتقرص بس.
>  بتوزعها كمان زي المرارة.
>  وما كلموهم بي سومانا.
>  سومانا الهاوي.
>  سومانا البمشي في الشارع يا راااجل.
>  سومانا اهيييييي.
>  سومانا البقطع الشاردة والواردة.
>  سومانا يا رااااجل.
>  سومانا اللما يعطش بشرب يا راجل.
>  سومانا اللما يشوت بجيب قون يا راااجل.
>  اكبر عمليات الفساد في الوطن المتمثلة في الخيانة الوطنية. 
>  لم تحدث جنرالات الجيش السوري عن قوات الدعم السريع المريخية.
>  فكانوا سبباً في زمبقة الجيش السوري الشقيق.
>  ضيعناهم في الضيعة تبعهم.
>  واتزمبقي.
 >   لكن بصراحة. 
>  ناس المجلس المنتدب يكفيهم تسجيل تيري وحمزة.
>  نصفق لهم ولو فشلوا في سداد ديون أتوا من أجل حلها.
>  فتيري وحمزة اضافة حقيقية.
>  والزولفاني وسومانا اضافة يستحق عليها الشكر من اضافها بدل الاستهزاء والتريقة.
>  حقوا نقدر بعضنا ونحترم بعضنا من أجل مريخنا.
 >   المهم. 
>  شكراً أولادنا جميعاً على تلك الروعة.
>  مع خالص تمنياتنا للاشقاء السوريين بالسلام والرفاهية، وان تعود سوريا مطمئنة ترفل في سلام وامان.
>  كرمان الشعب السوري الشقيق.
>  ايها الناس. 
>  ان تنصروا الله ينصركم.
>  اها.
>  نجي لي شمارات والي الخرتوم.
>  تعرف يا والينا.
>  كلو يوم بتطلع قرارات تزيد الحيرة فينا.
>  أسي كروت الجاز دي يا والينا.
>  لضبط الجاز ومنع تهريبه خارج البلد يا والينا.
>  ولا لضبط صرفنا واجبارنا على الترشيد يا والينا؟
>  في الحالتين القصة ما محتاجة رسوم كروت يا والينا.
>  يبقى الرسوم لزومها شنو قول لينا؟
>  وده نعتبره تعسف ولا اثراء بلا سبب يا والينا؟
>  وكلو شهر نمشي للكرت.
>  يا الصف طويل.
>  يا الشبكة طاشة.
>  يا الحالة واقفة وما ماشة.
>  يا أمشي صور شهادة البحث وتعال يا أخينا.
>  يا الموظفة ما جات عندهم بكا.
>  مات جار راجل حماة نسابة اختهم في القطينة.
>  نحنا ناقصين عذاب يا والينا؟
سلك كهربا
ننساك كيف والكلب قال نصيبكم في العذاب كملتوهو في دنياكم دي.
وإلى لقاء.
سلك
 

Who's Online

736 زائر، ولايوجد أعضاء داخل الموقع

Search