بابكر سلك

بابكر سلك

الأمن استتب

>  دواعٍ أمنية ألغت لقائنا بالإخوة الأهلة
>  كنا حقيقة نشتاق لفطومة أختي
>  ونحتاج لمداعبة روشا
>  ونستمتع بمشاغلة كردنة
>  ولكن لدواعٍ أمنية اتلغت القصة
>  المهم
>  أمس الأمن استتب
>  نحمد الله على الأمان يا مان
>  في سورة قريش الأمان من الجوع والخوف
>  أسي نحنا لقينا الأمان من الخوف
>  فاضل لينا نكمل السورة وندخل جوه الصورة ونستمتع بالأمان من الجوع
>  صعبة دي يامان بالمعطيات الموجودة
>  ولكن ليست بمستحيلة على الله
>  والعشم كبييير ياربنا
>  أنت أدرى
>  المهم
>  يوم الجمعة والسبت الأمن ما كان مستتب
>  بركة الإستتب
>  ومشينا الكورة
>  أكتب قبلها لذا أسميها كورة
>  بقياسها مع الشفناهوا في كأس العالم
>  يمكننا أن نطلق عليها كرورة
>  الكرورة السودانية
>  ونظل نطلق عليها ذلك طالما يد الطرف التالت مطلوقة فينا
>  المهم
>  رئيسة كرواتيا كانت نجمة كأس العالم
>  إسلام قالت لي
>  يابابا شوف المرة دي رشيقة كيف؟
>  كرش ماعندها
>  التقول ما بتاكل
>  قلت ليها أصلها مابتاكل
>  هي كان بتاكل كرواتيا كانت وصلت المرحلة دي
>  لكن علي اليمين يا إسلام
>  أعرسها ليكم وأجيبها السودان
>  تاكل أكل.. تاكل أكل
>  لمن تعرف حاجة
>  يلمن فيها حبوباتك
>  وهاك يا مديدة وهاك يا حلبة
>  تبقى قدر البرميل
>  تاكل لمن تحير الأكل ذاتو
>  في البلد دي يا بتي
>  شايفين السحاب وماعارفين المطرة صابة وين
>  آها
>  نرجع للكورة والأمن الإستتب
>  شايف في التشكيلة بيبو وبكري
>  وتفيد الأنباء بوصول سالم
>  قبضوا يا ربي ولا رجعوا على أمل؟؟
>  على أمل أخير من على أسد
>  مساعد مساعد مساعد الياي
>  والبقية صواميل عجل في الرصة الجديدة
>  والخوف يقولوا ليكم أنزلوا ده بص سيرة
>  الاستقالة كانت أرحب وأرحم وأكرم
>  أيها الناس
>  تناول الرائع معاوية الجاك موضوع المكتب التنفيذي
>  وضرب أمثلة لاخفاقاته الكتيرة
>  ولعدم المؤسسية التي نعيشها ويدفع تمنها المريخ
>  واستدل بالمخالصات المامفيدة
>  نحنا قبيييل شن قلنا يا معاوية؟
>  قلنا الطير بياكلنا
>  ولما بح صوتنا سنين ودنين في الموضوع ده
>  أطلقنا عليه لقب البوكلين التنفيذي
>  وقبلها أشرنا لضرورة وجود مدير تنفيذي مختص ومفرغ
>  ومدير مالي
>  وقام المجلس وقتها بفتح باب الوظائف
>  وحدد موعد قفل الباب
>  والناس جابت مستنداتها وسيرها الذاتية
>  والمكتب التنفيذي الى اليوم ما قال شيء
>  حتى مستندات الناس ما معروف مكانها
>  برافو أخي معاوية على النقد الموضوعي في لب وصلب وقلب الموضوع
>  ولكن ثمة سؤال
>  الميتين ألف دولار بتاعة سفرة الجزائر دفعناها نحنا ولا تبرعت بها جهة سيادية ؟
>  وفي الحالتين الحصل شنووووو؟؟؟
>  أيها الناس
>  الله ينصر المريخ
>  والتحكيم ما فاشل
>  لأنو تحكيمنا مشى كاس العالم
>  الفاشل تيمنا
>  الما قدر يصل كأس العالم
>  أيها الناس
>  إن تنصروا الله ينصركم
>  آها
>  نجي لي شمارات والي الخرتوم
>  والينا
>  بركة الأمن إستتب لينا
سلك كهربا
ننساك كيف والكلب قال إستتب إستتب وأنا مالي
والى لقاء
سلك

شاركنا برأيك

هل تتوقع أن يتجاوز الطاقم الاقتصادي الحالي الازمة؟

تواصل معنا

حالة الطقس بالخرطوم

Who's Online

430 زائر، ولايوجد أعضاء داخل الموقع

Search